వత్సవాయి పోలీస్ స్టేషన్లో ఘనంగా ‘యోగాంధ్ర’
హాజరైన ఎస్ఐ ఉమా మహేశ్వరరావు, విద్యార్థులు, ప్రజలు
సమాజంలో ఆరోగ్యంపై అవగాహన పెంచేందుకే ‘యోగాంధ్ర’
వత్సవాయి, జూన్ 7 యువ గళం న్యూస్ :
శారీరక దృఢత్వానికి, మానసిక ఉల్లాసానికి యోగా ఎంతగానో దోహదపడుతుందని వత్సవాయి పోలీస్ సబ్ ఇన్స్పెక్టర్ (ఎస్.ఐ) ఉమా మహేశ్వరరావు పేర్కొన్నారు. ‘యోగాంధ్ర’ కార్యక్రమంలో భాగంగా ఆదివారం వత్సవాయి పోలీస్ స్టేషన్ ఆవరణలో సిబ్బందితో పాటు స్థానిక విద్యార్థులు, ప్రజలకు ప్రత్యేక యోగా శిబిరాన్ని నిర్వహించారు. ఈ సందర్భంగా ఎస్ఐ ఉమా మహేశ్వరరావు మాట్లాడుతూ... నిరంతరం విధుల్లో ఉంటూ తీవ్ర ఒత్తిడికి గురయ్యే పోలీస్ సిబ్బందికే కాకుండా, నేటి పోటీ ప్రపంచంలో విద్యార్థులకు, నిత్య జీవితంలో ఒత్తిడి ఎదుర్కొనే సామాన్య ప్రజలకు కూడా యోగా ఎంతో అవసరమని చెప్పారు. ప్రతిరోజూ ఉదయం కొద్ది సమయం యోగాసనాలు, ప్రాణాయామం చేయడం ద్వారా ఏకాగ్రత, రోగనిరోధక శక్తి పెరగడమే కాకుండా, మానసిక ప్రశాంతత లభిస్తుందని సూచించారు. సమాజంలో ఆరోగ్యంపై అవగాహన పెంచేందుకే ‘యోగాంధ్ర’ లో భాగంగా ఈ ఉమ్మడి శిబిరాన్ని ఏర్పాటు చేసినట్లు ఆయన వెల్లడించారు.
ఈ శిబిరంలో యోగా నిపుణుల పర్యవేక్షణలో ఎస్ఐ, పోలీస్ సిబ్బంది, పాఠశాల, కళాశాల విద్యార్థులు మరియు స్థానిక ప్రజలు ఉత్సాహంగా పాల్గొని పలు రకాల ఆసనాలు, ప్రాణాయామం, ధ్యానం చేశారు. కార్యక్రమంలో వత్సవాయి పోలీస్ స్టేషన్ ఏఎస్ఐలు, హెడ్ కానిస్టేబుళ్లు, కానిస్టేబుళ్లు, హోంగార్డులతో పాటు పెద్ద సంఖ్యలో విద్యార్థులు, గ్రామ ప్రముఖులు పాల్గొన్నారు.
